Meðvirkni málstofa 6 - Bati og nýtt líf

Yfirlit

Skráningu lýkur 15. janúar!

Ertu farin/n að þekkja gömlu hegðunarmynstrin þín en veist ekki alveg hvernig þú átt að breyta þeim? Finnur þú fyrir sektarkennd þegar þú setur mörk? Eða langar þig að taka næstu skref í átt að heilbrigðari samskiptum og meiri innri ró?

Í þessari 90 mínútna málstofu skoðum við hvernig hægt er að vinna áfram með meðvirk mynstur og byggja smám saman upp nýjar venjur, sterkari sjálfsmynd og heilbrigðari tengsl.

Við kynnumst þremur stigum bata samkvæmt Judith Herman – að byggja upp öryggi, vinna úr erfiðri reynslu og endurheimta tengsl við sjálfan sig og aðra.

Einnig skoðum við hvernig hægt er að þekkja merki um framfarir, takast á við bakslög og efla sjálfsumhyggju. Áhersla er lögð á að breytingar gerast í litlum skrefum og að bati snýst ekki um fullkomnun.

Í verkefnavinnu móta þátttakendur eigin 30, 60 og 90 daga áætlun með raunhæfum markmiðum, skrefum til að styrkja eigin mörk og leiðum til að viðhalda jákvæðum breytingum.

Þú ferð heim með persónulega áætlun, upplýsingar um stuðningsúrræði og verkfæri til að halda áfram að vinna með eigin velferð og tengsl.

Tími: Laugardagur 23. janúar 2027, kl. 14:00–15:30
Lengd: 90 mínútur
Kennarar: Baldur Einarsson og Barbara Hafey Þórðardóttir
Byggt á: Judith Herman, John Gottman, Pia Mellody og CoDA.

Málstofan stendur sjálfstætt og ekki er nauðsynlegt að hafa tekið þátt í fyrri málstofum.

20% afsláttur með kóðanum MEDVIRKNI ef keyptar eru fleiri en ein málstofa.

Hagnýtar upplýsingar

Meðvirkni – sex málstofur frá mynstri til breytinga

Sex sjálfstæðar 90 mínútna málstofur þar sem fræðsla, sjálfsskoðun og verkefnavinna fléttast saman.

Hver málstofa stendur sjálfstætt og hægt er að velja þær eftir áhuga og þörfum. Saman mynda þær þó heildstæða vegferð – frá því að skilja meðvirk mynstur og hvaðan þau koma yfir í að byggja upp heilbrigðari tengsl við sjálfan sig og aðra.

Málstofurnar sex

1. Skilgreining og mörk - 30. október kl. 17:30-19:00
Hvað er meðvirkni í raun og veru? Við skoðum fimm megineinkenni meðvirkni samkvæmt Pia Mellody og muninn á innri og ytri mörkum. Grunnurinn sem hinar málstofurnar byggja á.

2. Sjálfsmynd og meðvirkni - 31. október kl. 14:00-15:30
Við skoðum þrjú lög sjálfsmyndarinnar, hvernig við metum eigið virði og röddina sem tekur við þegar eitthvað gengur úrskeiðis. Markmiðið er að koma auga á það sem hefur mótað sýn okkar á okkur sjálf.

3. Hvað kom fyrir þig- 27. nóvember kl. 17:30-19:00
Við skoðum streituviðbrögðin fjögur – þar á meðal þóknun – og ólíkar birtingarmyndir vanrækslu í uppeldi. Áherslan er á að skilja hvers vegna við bregðumst við eins og við gerum í dag.

4. Tilfinningar og tengsl - 28. nóvember kl. 14:00-15:30
Hvað gerist í okkur þegar tengsl verða óörugg? Við vinnum meðal annars með hugmyndir úr tilfinningamiðaðri parameðferð, riddarana fjóra hjá Gottman og tilfinningadagbók sem þátttakendur taka með sér heim.

5. IFS og partar - 22. janúar 2027 kl. 17:30-19:00
Við kynnumst Sjálfinu, verndurum og útlögum samkvæmt IFS. Þátttakendur kortleggja eigið innra kerfi og fara í leidda æfingu þar sem þeir fá tækifæri til að kynnast einum parti betur.

6. Bati og nýtt líf - 23. janúar 2027 kl. 14:00-15:30
Hvernig lítur bati út í raun? Við skoðum þrjú stig bata samkvæmt Judith Herman, leiðir til að sjá og mæla eigin framfarir og þátttakendur móta sína eigin 30, 60 og 90 daga áætlun.

Hverri málstofu fylgir vinnubók og vinnublöð til að vinna með á staðnum og halda áfram með heima. Heimildir og ítarefni fylgja einnig fyrir þau sem vilja kafa dýpra.

Þú getur komið á eina málstofu eða fylgt allri vegferðinni. Hver málstofa stendur ein og sér – en saman segja þær stærri sögu: frá því að þekkja mynstrið til þess að skapa eitthvað nýtt.

Efnisskrá

Þetta á við þig ef þú kannast við þetta:

• Þú skilur núna hvaðan mynstrin koma, en veist ekki hvernig daglegt líf á að líta út án þeirra.

• Þú hefur sett mörk og fundið sektarkenndina á eftir.

• Þú tekur eftir framförum suma daga og dettur aftur í gamla farið aðra.

• Þú veltir fyrir þér hvort þetta verði einhvern tíma auðveldara.

• Þig vantar áætlun, ekki fleiri útskýringar.

• Þig langar að vita hvert þú getur leitað þegar málstofunum lýkur.

Lýsingin

Bati er ekki atvik. Hann er ferðalag.

Það kemur ekki dagur þar sem meðvirknin er farin. En það koma dagar þar sem þú tekur eftir gamla viðbragðinu áður en það tekur yfir. Dagar þar sem þú segir nei og heimurinn ferst ekki. Dagar þar sem þú getur verið ein eða einn með sjálfri eða sjálfum þér án þess að kvíða.

Það eru merkin um að eitthvað hafi breyst. Og þau koma smám saman, ekki öll í einu.

Í þessari málstofu skoðum við hvernig bati lítur út í raun: þrjú stig hans, frá því að byggja upp öryggi, yfir í að vinna með söguna, og loks að tengjast lífinu og öðru fólki á nýjan hátt.

Við förum yfir merkin um framfarir, svo þú getir séð það sem þú hefur þegar áorkað. Og við skoðum hvernig heilbrigð tengsl líta út: gagnkvæmni, sveigjanleiki og að geta tekist á um hluti án þess að missa tengslin.

Svo horfum við fram á við. Þú gerir þína eigin áætlun um bata til 30, 60 og 90 daga: eitt mynstur til að taka eftir, eitt mark til að halda og eitt skref í sjálfsumhyggju. Og við endum á leiddri æfingu þar sem þú þakkar þeim pörtum sem hafa unnið svo hart til að vernda þig.

Þú ferð heim með áætlun, lista yfir stuðning sem stendur þér til boða, og eitt skref sem þú getur tekið strax í dag.

Dagskrá

Málstofan fer fram laugardaginn 23. janúar frá kl. 14:00-15:30 í Háskólanum á Akureyri.